Førarkort i klasse S gir deg rett til å køyre snøscooter med eller utan tilhengjarslede. I enkelte tilfelle kan du køyre snøscooter utan å ha klasse S.
Du må vere minst 16 år for å ta førarkort for klasse S.
Informasjon om snøscooteren, for eksempel om han er i klasse 1 (kode B1) eller 2 (kode B2), står i vognkortet.
Snøscooter
Du kan køyre alle typar snøscooter med eller utan tilhengjarslede.
Dersom du er under 18 år
Er du yngre enn 18 år, kan du berre køyre snøscooter i klasse 1. På ein snøscooter i klasse 1 er forholdet mellom effekt og eigenvekt maks 0,35 kW/kg.
Du kan køyre i Noreg og Sverige
Til skilnad frå andre førarkortklassar gjeld klasse S ikkje internasjonalt. Du har likevel lov til å køyre i både Noreg og Sverige. Snøscooteren må vere registrert i Noreg eller Sverige.
Ver merksam på kvar du køyrer
Av omsyn til miljøet og trafikken er det avgrensa kvar og korleis du kan køyre med snøscooter.
Det er normalt forbode å køyre med snøscooter på offentleg veg.
Når kan du køyre snøscooter utan førarkort for klasse S?
Du har rett til å køyre snøscooter dersom du tok førarkort for motorsykkel, personbil eller traktor før 1. juli 2006. Dette gjeld sjølv om du ikkje har gjennomført opplæring og prøver i klasse S.
Dersom du budde i Noreg då du tok svensk førarbevis for snøscooter, er førarbeviset ikkje gyldig i Noreg.
Har du svensk førarbevis for snøscooter, kan du køyre i Noreg berre dersom du
anten var busett i Sverige då du fekk det svenske førarbeviset,
eller du fekk det under eit dokumentert studieopphald i Sverige som vara i minst seks månader.
Statens vegvesen kan gi arrangørar løyve til å gjennomføre gruppeturar på snøscooter for deltakarar utan førarrett. Deltakarar frå Noreg må ha førarkort i ein annan klasse. Utanlandske deltakarar må dokumentere rett til å køyre motorvogn i Noreg. Alle må ha tilstrekkeleg ferdigheit.
