Av- og påregistrering

Det er gratis å avregistrere køyretøyet ditt – og å registrere det igjen - uansett kor lenge det har vore avregistrert. Det er unnatak dersom du ikkje har betalt omregistreringsavgift ved eigarskifte. Då må du betale omregistreringsavgifta når du registrerer køyretøyet. 

Når køyretøyet er avregistrert, skal du ikkje bruke det. Køyretøyet blir uforsikra, og derfor kan du bli halden økonomisk ansvarleg dersom køyretøyet er i ei ulykke. Sidan køyretøyet er uforsikra er det også viktig at du ikkje parkerer det på offentlege plassar eller på andre stader der det kan forårsake skade.  

Sjølv om det ikkje lenger er noko krav om at skilta skal takast av når køyretøyet er avregistrert, tilrår vi framleis at du tar dei av eller markerer på ein annan måte at køyretøyet ikkje skal brukast. Du må også informere alle som kan bruke køyretøyet, om at det er avregistrert. 

Når du har avregistrert eit køyretøy sjølv, kan du eller ein annan eigar registrere det att. De kan registrere køyretøyet sjølve på Di side når det har gyldig forsikring og alle andre vilkår for registrering er ok. Begge eigarane må godkjenne registreringa innan 10 dagar, anten på Di side eller på ein trafikkstasjon. 

Så lenge køyretøyet er avregistrert, får du ikkje varsel om EU-kontroll. Dersom fristen for godkjend EU-kontroll går ut i perioden køyretøyet er avregistrert, må det ha godkjend EU-kontroll før du kan registrere det.

Dersom fristen for EU-kontroll går ut, må du kjøpe prøveskilt for å køyre til ein godkjend verkstad og gjennomføre kontrollen.

Dersom køyretøyet har to eigarar og skal avregistrerast må begge eigarar godkjenne avregistreringa innan 10 dagar, anten på Di side eller på ein trafikkstasjon. Hugs at du må bestille time før du møter opp på trafikkstasjon og ha med gyldig legimitasjon.

Same regel gjeld når køyretøyet skal påregistreres.

Er du under 18 år må du levere inn skilta for å kunne avregistrere køyretøyet ditt sjølv. Leverer du inn skilta, blir dei makulerte. Les meir om moglegheitene for å levere inn skilta på sida til trafikkstasjonen din, eller bestill ein time.

For å avregistrere køyretøyet utan å levere inn skilta må dine føresette møte opp på ein trafikkstasjon, legitimere seg og signere på erklæring om avregistrering. Dersom køyretøyet skal registrerast att, må dine føresette møte opp på ein trafikkstasjon, legitimere seg og signere på skjemaet Stadfesting mindreårig eigar/medeigar (PDF). 

Dersom berre ein av dine føresette møter opp på ein trafikkstasjon, må hen ta med og vise fullmakt og kopi av legitimasjon frå den andre føresette. 

Fullmakta må innehalde: 

• Namn på personen under 18 år 
• Namn på fullmaktsgivar 
• Namn på den som får fullmakt 
• Tydeleg forklaring av kva fullmakta gjeld (døme; «eg … har foreldreansvar for den mindreårige, og gir med dette fullmakt til å registrere køyretøy tilhøyrande den mindreårige – medrekna å underteikne på registreringspapir på mine vegner.) 
• Stad og dato 
• Underskrift frå fullmaktsgivar 

Tolletaten, Politiet og Statens vegvesen har myndigheit til å avregistrere køyretøy. I slike tilfelle blir køyretøyet også avskilta. Køyretøy kan til dømes bli avregistrert dersom manglar frå utekontroll ikkje er retta opp eller at «gamle» skuldige avgifter ikkje er betalte. Køyretøyet kan også ha vorte avskilta på grunn av manglande omregistrering. 

Vart køyretøyet avskilta på grunn av bruksforbod, må du betale eit gebyr før du kan hente ut skilta. 

Er køyretøyet avskilta og du ønskjer å få tilbake skilta og registrere det igjen, må du sørgje for at 

• forsikringa er i orden 
• EU-kontrollen er godkjend 
• eventuelle andre forhold der det er gitt bruksforbod, er ordna opp i

Skilta til køyretøy som er avskilta blir oppbevarte på ein trafikkstasjon i tre månader etter at køyretøyet vart avskilta. Lurer du på kva trafikkstasjon som oppbevarer skilta dine, ta kontakt med oss. 

Når du vrakar eit køyretøy kan du få utbetalt vrakpant frå Skatteetaten dersom vilkåra for dette er oppfylte.

Hugs å sørgje for at skilta til køyretøyet du vrakar ikkje blir misbrukte. Du kan la skilta følgje køyretøyet til vraking eller levere skilta inn på ein trafikkstasjon for makulering. Les meir om moglegheitene for å levere inn skilta på sida til trafikkstasjonen din, eller bestill ein time.

Statens vegvesen får automatisk melding om at køyretøyet er vraka når det er levert hos ein godkjend biloppsamlingsplass. Du treng derfor ikkje avregistrere køyretøyet hos oss.