Alkolås i buss og minibuss

Alle bussar og minibussar som driv løyvepliktig persontransport, skal ha alkolås.

Kravet om alkolås gjeld når det blir drive persontransport mot vederlag. Dette vil seie systematisk bruk av køyretøyet til persontransport mot at det blir gitt godtgjersle, og omfattar alle typar godtgjersle som blir gitt for ei transportteneste. Det er ikkje eit krav at godtgjersla skal dekkje kostnader eller gi forteneste.

Kva er alkolås?

Alkolås er ei teknisk eining som vanlegvis blir tenningssystemet kopla til, og som skal hindre at føraren skal kunne starte køyretøyet med promille.

Alkolåsen består av eit handsett og ein elektronisk boks (relé). På handsettet er det eit munnstykke som føraren må blåse i. Viss føraren ikkje tek pusteprøve eller alkolåsen måler promille over den definerte grenseverdien, vil køyretøyet ikkje kunne startast.

Formålet med alkolås

Alkolås i køyretøy er eit trafikktryggleikstiltak som skal redusere risikoen for at sjåførar kan køyre under påverknad av alkohol. Formålet med alkolås er å betre tryggleiken for passasjerane og på sikt redusere ulykker i trafikken.

Bruk av alkolås

Sjåføren må blåse i alkolåsen før køyretøyet kan startast opp. Viss føraren ikkje tek pusteprøve eller alkolåsen måler promille over den definerte grenseverdien, blir alkolåsen låst for ein kortare periode med ei åtvaring. Etter første ugyldige pusteprøve blir alkolåsen låst i nokre minutt, og lengre for eventuelle nye ugyldige pusteprøver.

Alkolås i «russebussar»

Russebussar som russen sjølv eig eller disponerer, til dømes leiger/leasar, er normalt sett ikkje underlagd løyveplikt. Dette gjeld både om russen køyrer bussen sjølv (t.d. at ein av foreldra køyrer) eller om russen leiger inn ein sjåfør. Hovudregelen er at desse russebussane derfor ikkje må ha alkolås.

Viss russen leiger ein buss frå eitt firma og ein sjåfør frå andre firma, er det heller ikkje krav om alkolås.

Desse «russebussane» må ha alkolås

Minibuss og buss som er underlagd løyveplikt må ha alkolås.

• Viss russen leiger ein buss med sjåfør frå eitt og same firma er transporten løyvepliktig, og bussen må då ha alkolås.
• Viss firmaet som leiger ut buss til russen også leiger ein sjåfør frå eit anna firma, så er det løyvepliktig og bussen må ha alkolås.
• Viss russen tek betaling for at andre russ eller passasjerar som ikkje tilhøyrer russebussen sit på, må bussen ha alkolås.