Klargjer til første storstøypen

Det er det søre brufundamentet på Bu som blir den første store oppgåva for Statens vegvesen og betongentreprenør Veidekke. Her blir det ei samanhengande støyping i kring 36 timar.

Forskalingskassen har stått klar ein stund og den siste tida har fjellforankringa og armeringsstålet kome på plass i eit finmaska nettverk inne i kassen. Fundamentet ligg berre nokre meter over flomålet i fjorden, og første støypen blir 6 meter høg. Det rektangulære fundamentet blir på 150 kvadrat. Støypen utgjer 900 kubikkmeter, og blir i mengde den største av støypejobbane på tårna til Hardangerbrua.

Tårnarbeidet skjer med såkalla klatreforskaling. Tilsaman skal det utførast 51 slike klatresteg med kontinuerleg støyping over mange timar – før tårna er oppe i kring 200 meters høgde.

I volum blir tårnet på Bu på kring 7 000 kubikk, medan brutårnet på Vallavik blir på knappe 6 000 kubikkmeter.

På Vallavik pågår det arbeid med utsprenging av byggjegropa til tårnfundamentet. Når dette er ferdig vil Veidekke også her gå i gang med førebuingar til støyping av fundament og seinare bygging av brutårnet.

Om betongarbeidet går etter planen skal brutårna stå ferdige i februar 2011.

• 

• 

• 

• 

• 

•