Ny elektro-start på Hardangerbrua

Statens vegvesen har vore i dialog med konkursbuet i Danmark, og gjort avtale om at dei stiller med fagfolk som er godt kjent med anlegget på prosjektet. Det er lite arbeid som står att. Det er likevel ein jobb som må avsluttast no. Buet har opplyst at dei vil fullføra oppdraget i april 2014.

Stillstand fem månader

Det har vore synfaring på Hardangerbrua med representantar for konkursbuet. Mellom oppgåvene som står att er elektroanlegget i spreiekamra, som må på plass før bruentreprenøren kan fullføra oppgåver her. Det står også att arbeid inne i brutårna, samt i tavlerom i tunnelane som fører fram mot hovudspennet. Det har vore pause i elektro-arbeidet sidan Hardangerbrua blei opna i august. Noko var planlagt, men frå oktober var det konkursen som førte til utsetting på siste rest av arbeidet. Etter konkursen har det pågått drøftingar mellom buet og Statens vegvesen.

Ingen av oppgåvene som står att av elektro-arbeidet vil påverka trafikken over Hardangerbrua.