Kva kan du køyre med førarkort klasse B?

Du kan køyre ein personbil som har ei tillaten totalvekt på maks 3 500 kg. Han kan maks vere godkjend for 8 passasjerar i tillegg til førar.

Dersom du har eit gyldig EØS-førarkort for klasse B utferda for minst to år siden, kan du køyre motorvogn registrert i gruppe N 2 (lastebil). Du finn informasjon om kva motorvogngruppe køyretøyet høyrer til, ved å sjå under pkt. 5 «klassifisering» i vognkortet til køyretøyet.

Unntaket omfattar motorvogn som har ei tillaten totalvekt over 3 500 kg, men ikkje over 4 250 kg.

Vekta som overstig 3 500 kg, skal

• berre skrive seg frå den ekstra vekta som følgjer av framdriftssystemet, samanlikna med framdriftssystemet i ei motorvogn av same dimensjonar, men som er utstyrt med forbrenningsmotor,
• ikkje skrive seg frå at lastekapasiteten har auka

Merk at tilhengjar kan ikkje nyttast når du køyrer ei motorvogn som fell inn under dette unntaket.

Det er også krav til at 

• køyretøyet er registrert i Noreg eller ein annan EØS-stat
• vilkåra er dokumenterte med merknad i vognkortet
• dokumentasjonen på vilkåra knytte til motorvogna ligg føre på norsk, svensk, dansk eller engelsk, og at dokumentasjonen blir tatt med i bilen under køyring

Yrkessjåførkompetanse

Køyre- og kviletid

Transportløyve og andre løye

Du kan trekkje tilhengjar etter ein personbil når den tillatne totalvekta til tilhengjaren er maks 750 kg.

Du kan trekkje ein tyngre tilhengjar dersom den tillatne totalvekta for bilen og tilhengjaren til saman er maks 3 500 kg.

Vekta av tilhengaren må vere innanfor det bilen har lov å trekkje. Om du er usikker på om du kan trekkje ein bestemt tilhengar med bilen din, kan du enkelt sjekke det i tilhengjarkalkulatoren vår. 

Tilhengarkalkulator

Med kode 96 - høgare samla tillaten totalvekt for personbil med tilhengjar

Har du kode 96 på førarkortet ditt, kan den tillatne totalvekta for bilen og tilhengjaren til saman vere maks 4 250 kg.

Vil du trekkje ein tyngre tilhengjar (inntil 3 500 kg) enn det er mogleg med klasse B eller klasse B med kode 96, må du ta klasse BE.

Du kan køyre alle typar moped med to, tre eller fire hjul.

På førarkortet er dette markert som klasse AM.

Du kan køyre motorsykkel med fire hjul.

I Noreg kan du trekkje ein tilhengjar på inntil 750 kg dersom

• motorsykkelen har eit slagvolum over 125 cm³
• det står i vognkortet til motorsykkelen at han kan trekkje ein tilhengjar

Med klasse B tatt før 1. juli 2006

Du kan køyre snøscooter med eller utan tilhengjarslede. 

På førarkortet er dette markert som klasse S.

Førarrett for snøscooter gjeld berre i Noreg og Sverige.

Du kan køyre ATV som er registrert som motorsykkel med fire hjul. Då gjeld dei same reglane som for motorsykkel med fire hjul.

Med klasse B tatt før 19. januar 2013

Du kan køyre motorsykkel med tre hjul.

Du kan køyre traktor med ei tillaten totalvekt på maks 3 500 kg. 

Dersom du trekkjer ein tilhengjar, må traktoren maks kunne køyre 40 km/t.

Førarrett for traktor gjeld berre i Noreg.

Med klasse B eller T tatt før 1. januar 2005

Du kan køyre traktor med eller utan tilhengjar. Det er inga avgrensing på vekt eller kor fort han kan gå.

På førarkortet er dette markert som kode T 142.

Du kan køyre motorreiskap med ei tillaten totalvekt på maks 3 500 kg. Ein motorreiskap (Lovdata) kan for eksempel vere ein gaffeltruck eller ein hjullastar.

Dersom du trekkjer ein tilhengjar, må motorreiskapen maks kunne køyre 40 km/t.

Førarrett for motorreiskap gjeld berre i Noreg.

Motorreiskap i arbeidssamanheng

Skal du køyre motorreiskap i arbeidssamanheng eller i samband med næring, kan det stillast særlege krav til opplæring og prøve.

Arbeidstilsynet kan svare på kva for nokre konkrete krav som blir stilte til dei ulike motorreiskapane.

Sjå forskrift om utføring av arbeid (Lovdata)

Med klasse B tatt før 1. januar 2005

Du kan køyre motorreiskap med ei tillaten totalvekt på inntil 7 500 kg.

Du kan køyre motorreiskap med ei tillaten totalvekt over 7 500 kg dersom han maks kan køyre 50 km/t.

På førarkortet er dette markert som kode 152.

Du kan køyre beltebil med eller utan tilhengjarslede.